دموع في عيون وقحة
دموع في عيون وقحة
_____
لو يضحك البحر لي بعيونه الوقحة
تلقاه بكرة مع الميناء متواطي
يابحر يابحر يابحر افتح الصفحة
واكتب من اول سطر ، هذا الزمن واطي
باشيل مايك مع اسماكه مع ملحة
وتعال شل دمعةٍ طاحت على الشاطي
ضامي لشوفتك ذابحني الظما ذبحة 1️⃣
وشفيك يابحر متردد ومتباطي
عطني وجوه قبيحة وأنفُسٍ سمحة
لاصار وجه المبادىء صار مطّاطي
خذني معك يابحر من جد مو مزحة
يا الأزرق اليود ، ياالمتغطرس الساطي
خذ دمع عيني وصلّح به خرز سُبحة
واذكر وسبّح بحزني المانع العاطي
يابحر جيتك خيالٍ قد هوى صرحه
مُحبط ، و ابي منك تخرجني من احباطي 2️⃣
جيتك أدوّر بجدر الحزن عن فتحة
منها انبثق نور فرحة عاليٍ واطي
مسافرٍ بين دمٍ منسكب جرحه
وبين وخزة ضمير يكرّر اغلاطي
على كتوف التعب لي رتبة ولمحة
وفوق صدر الهزايم تلمع انواطي
الى متى ياوطن بآنام بك واصحه
والى متى آرتّب بلادي في شناطي !
تعليقات
إرسال تعليق